محتاج
لك بادفي يديني من ملامس يديك
هالثانيه بالضبط ما اظن الشعور يفوتها
عندي قصيده ودها من خالص احساسي تجيك
حتى معانيها تبي تاصلك قبل بيوتها
قصيدة يرجع سببها منك واليك
وانت تعرفها من ملامحها وبحة صوتها
ياللي بديتك شوق كيف اشواق قلبي تنتهيك
واحلام عمري لافقدتك ترجع لتابوتها
اي والله احبك ولازلت اعشق وصالك وابيك
وفي خاطري لك هيبة ملوك العرب ببشوتها
لاجيت ابشكي لك رجعت وقلت وشلون اشتكيك
واسكت لو ان جروح قلبي ماتطيق سكوتها
كم لي وانا انادي عليك امال عمري واحتريك
وكم لك تجيب اعذار من زرق البحور وحوتها
مع كل هذا والله اني مشتريك وابشتريك
واحسد عليك وجوها وبيوتها
لاتكثر ظنوني علي وتكثر ظنونك عليك
نفسي فراقك ضيم حالتها وقربك قوتها
اموت لك /اموت منك/ اموت معك/ اموت فيك
ضع خط تحت الموته اللي تعجبك واموتها
